اورمو گؤلو و تاریخی_اینسانی مسؤلیت و وظیفه میز

اورمو گؤلو آذربایجانین یاشام قایناغی و حیاتینین سمبولودور. اورمو گؤلو اولمادان یوردوموز و بو یوردون اوستونده کی یوردداشلاریمیز استاندارد بیر یاشام سوره بیلمزلر. بو گون اورمو گؤلونون وار اولان فاجیعه وی دورومو هر بیریمیزی اولومسوز ائتکی له ییر و گلجه ییمیزه گؤره نگرانلیق یارادیر.
اینسانین یاشامینین یئره و اکولوژی یه باغلانتی سی دانیلماز بیر گئرچکدیر. یئرین، سویون، اورمانین و هوانین دورومو یاخشی دئییل سه دئمک اینسانین دا یاشاییش دورومو و استانداردی یاخشی دئییل.
نه یازیق کی اورمو گؤلونون بو تهلوکه لی دوروموندان قورتاریلماسینا لازیم اولان اراده گؤرونمه مکده دیر. اورمو گؤلو صیرف شعار و سؤزله دئییل، اراده و برنامه لی اجرایی و جیدی ایشلرله بو دورومدان قورتولا بیلر. بونا گؤره ده بوتون میلت و مسوللار بو موضوع دا بسیج اولوب جیدی بیر ایشلر گؤرمه لی دیرلر. چونکی اورمو گؤلو یوخ اولورسا آذربایجانین و اوندا یاشایان میلیونلارلا اینسانین نورمال حیاتی محو اولاجاقدیر.
بیزیم نسل تاریخ و گلجک نسیللر قارشیسیندا اورمو گؤلونه گؤره جواب وئرمک دن هئچ واخت بویون قاچیردا بیلمیه جکدیر. گؤزلریمیزین اؤزونده کی هر گون اؤلومه داها بیر آددیم یاخینلاشان اورمو گؤلونون قارشیسیندا کی وظیفه میز چوخ بؤیوک و تاریخی بیر اینسانلیق وظیفه سی و مسؤلیتی دیر.
بیر آن اؤنجه هم دولت و هم میلت بو موضوع اوچون حرکته کئچمه لی  جیدی، علمی، اجرایی و نتیجه وئرن ایشلر گؤرمه لی دیرلر. بودجه آزلیغی و یا یوخلوغو بو بؤیوکلوک ده بیر فاجعه نین قارشیسیندا قبول اولونماز بیر سؤز و دلیل دیر.
گرک هر چئشید جیدی یول امتحان اولوب و دولت جیدی اولاراق بو ایشله مشغول اولسون. چونکی هر گون هر ساعت و هر آن اورمو گؤلو داها محو اولماغا ساری گئدیر. گلجه ییمیز بو گونوموزدن آسیلی دیر و هامیمیز اورمو گؤلو قبالیندا مسؤلوق. بو تاریخی مسؤلیت دن هئچ کس، هئچ بیر بهانه ایله بویون قاچیرا بیلمز.

یازار: ملیحه برقی صدقیانی