خانه / تورکجه / دانیلماز جنایتدی جیلولیق

دانیلماز جنایتدی جیلولیق

-اوشاقلیق چاغلاریندا، آتام کئچمیش خاطره لریندن دانیشاندا، جیلولیق کلمه سین چوخ ایشله دردی، فرقه‌ حکومتیندن دییردی، آذربایجانین‌ باشینا گلدیکلریندن سوز آچاردی. غلام یحیی، دئمقیرات، پیشه وری، بی ریا، فدایی، کلمه لری آتامین لهجه و سس ایله هله ده قولاغیمدا سسله نیر.
جیلولیق کلمه سینین معناسین بیلمزایسمده، اوندان یارانان قا‌ن قوخوسون ایییلردیم سانکی. ائرمنی لرین آذربایجان تورکلرینه نه ائتدیکلری، عوثمانیلارین نجور یاردیما چاغریلماقلاری، خوی شهرینده دویوشون نجور گئچیریلمه سی، اورمیه سالماسدا نئچه نئچه قتل عام صحنه لری، خویلولارین مردانه دوروشوب ساواشلاری،‌ خاطیره خاطیره ذئهنمیه کوک سالیب اوزاماندان.‌ ائرمنیلرین، ائرمنی لهجه سیله‌ توروکو دانیشماقلارین، حتی تورکلری گوللویه باغلاماقلارین، یامسیلاردی آتام. حتی دییه ردی عثمانلی عسگرینین توپ گول له سی، ائرمنی توپونون لوله سینین آغزینا سوخولموشدو دومبلن دوز. آتام بو خاطره لرین بیر آزین اوزو یاشامیشدی، بیرآزین آتاسیندان نقل ائلردی.
ایندی ایسه جیلولیق، بیلیرم ندی. حتی آتامین نقل ائلدیگی خاطیره لر اولماسایدی ده، اوخویوب بیله جک ایدیم جیلولیق نه ایمیش، و باش تاپاجاق ایدیم، روسلارلا انگلیسلرین اوزامانکی قانجیق سیاستلری نه ایمیش، باتی آذربایجانیمیزدا.
آیدین آشکار ایستیردیلر،بوردا بیر ائرمنستان مملکتی یاراتسینلار، او واسیطه ایله ده تورکیه و آذربایجان آراسیندا اولان تاریخی و سرزمینی رابطه نی قیرسینلار. انگلیسلرله روسلارا، ائرمنیلر یالنیز ائرمنی و مسیحی اولدوقلاری اوچون‌ یوخ، بلکه کریستینلیکدن چوخ چوخ مهم، تورکیه و آذربایجان تورکلری آراسیندا بیگانه لیک یاراتماق و اولاری بیربیریندن قیرماقدی. ائله ایندی ده همان سیاست اوزه رینده چابالیرلار.‌ (باتی لیلار صفوی دوورونده ده همان سیاستی قوشوب، چالدیران ساواشین دوزه نلدیلر.)
چوخ شوکور، اوزامان جیلولولارین حامیلرینین مقابیلینده، عوثمانلی دولتی، آذربایجانیلار طرفینده ن یاردیما چاغریلدی، تانریا مین شوکور, عثمانلی دوللتی ده آذربایجاندا‌ تورکلری یالنیز بوراخمادی، آرازین اوتاییندا روس جیبهه سینده دویوشن عسگرلردن، بیر قیسمتین آذربایجانا‌ کمک گوندردی و قورتاردی تورکلری، ائرمنیلر جنایتین دن.
البته سونرالار استالین، آرازین اوتاییندا، ائرمنی لری، اوردان بوردان ییغیب گتیریب، قوزئی آذربایجان توپراقلاریندا یئرلشدیریب، بیر ائرمنی دولتی یاراتدی، تاریخی توپراقلاریمیزدا.
بو گونوموزده،باتینین پینهان و آشکار گوجلری طرفینده ن، باتی آذربایجان دا همان پیلانی یئرینده اوتورتماق ایسته ییرلر. ائرمنیلرله باشارا بیلمدیکلری پیلانی، یازیق کوردلر ایله ایستیرلر ایجرالاندیرسینلار. بیر کورد حکومتی تورکیه و آذربایجان آراسیندا، ایکی تورک توپراقلارین بیر بیریندن آییرماق اوچون.‌.
غربی گوجلر، بو پیلانین ایجراسی اوچون بوتون مستقیم و غیر مستقیم عامیل لرین توپلاییبلار، هئچ ده شوخلوقلاری یوخدو. بو پیلانین ایجراسی اولارین داها سونراکی سیاستلری اوچون، چوخ اونملی ساییلیر، اولارا کوردلر و اولارین قارا گونه دوشمکلری اصلا مهم دئییل. اونلار بو پیلاندان واز کئچه بیلمزلر.

اما باتی اوچون زمان چوخ آزدی. تورکیه مملکتی گونو گونده ن گوج لنیر. آذربایجاندا میللی روح گلیشیب و داها دا گوجلنمک حالیندا دی، آرازین قوزئینده آذربایجان مملکتی هر لحظه اینکیشاف تاپیر. بیر طرفدن ده، ائرمنستان آدلی بیر ائیرتی و قوندارما مملکت، گونو گوندن ضعیف لیر، و گئدیرکی باتی گوجلرینه بیر آغیر پروبلمه چئوریلسین.‌
باتی گوجلری، مجبوردولار منطقه ده قونداریب یئرلشدیردیکلری عامیل لرین، تله سدیرسینلر، ….تئز اولون واخت یوخدو، تورکلر گوجلنیر دئسینلر.
دقیقا بو نقطه ده دی کی جناب شهریاری، استاندار استان آذربایجان غربی، ال آیاغین ایتیریب، تله سیب، بارا وئریب، بیلر بیلمز تورکلره نیسبت، ایچینده اولان نیفرت و‌کینه سین، یئمک بوخچاسینین اوستونه قایتاریب. جیلولیق سوی قیریمین دانیب، چوخ یاخین تاریخین دانیلماز و آشکار جنایتین، ائرمنی داشناکلارین یاراتدیغی سوی قیریم جنایتین.
فارس محور حکومت طرفیندن، غربی آذربایجانا، یئرلشدیریلن کورد استاندار، آذربایجان تورکونون، ایپین ائشمکده،… جناب مهرعلیزاده، اصفهان استانینین تورک‌دیللی استانداری دا، جان و دیلدن فارس خالقینا خیدمت ائتمکده.
استاندار ایله استاندارین نه قدرده فرقی واریمیش دئمک..

حسن ارک

این مطلب را شیر کنید

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

من ربات نیستم *

کتابخانه دیجیتالی بایداق راه اندازی شد. برای دسترسی به کتابخانه از منوی کتابخانه بایداق استفاده نمائید. رد کردن