خانه / تورکجه / زئيتون دالى- پرده نين آرخاسيندا

زئيتون دالى- پرده نين آرخاسيندا

توركيه نين “زئيتون دالى” آديندا سوريه نين قوزئيى اؤزَل ليك له “عفرين” بؤلگه سينده آپارديغى ساواش قونوسوندا چئشيدلى يؤنلردَن فرقلى باخيشلار ايره لى سورولوب. بو باخيشلارين چوخو، توركيه نين، آمئريكا ايله روسيه آراسيندا يارانان يؤنه تگى سَل (سياسى) دَنگه سيزليگ دن يارارلاناراق بلكه ده روسيه نين ياشيل ايشيغى ايله اؤز اولوسال ايستَكلرينى- بو آرادا كورد اؤرگوتو پ ك ك نين گله جك ده تَهلوكه سينى ائتگى سيز دوروما گتيرمك دوشونجه سينى- آچيقلاييبلار. بو باخيشلارين سوْنوجوندا بير قاچيريلماز سئچيم گؤزه چارپير. سانكى كئچن ايلده آختالانميش داربه اوْلاييندان سونرا توركيه-آمئريكا ايليشگى لرى پوْزولوب، بئله جه ايسته ر- ايسته مز توركيه – روسيه آراسيندا ايستراتئژيك ايليشگى لر باش توتمادادير. وورغولاديغيم باخيشلار دوز اولدوغو حالدا آنجاق پرده نين اؤنونده گئدن اوْيوندور. يؤنه تگى آلانيندا داها دوغرو-دَرين دوشونمك ايچين پرده نين آرخاسينادا باخمالى ييق. توركيه-آمئريكا آراسيندا نئچه ايللر ياشانان ايستيراتئژيك ايليشگى لرين بيردَن-بيره آرادان گئتمه سى دوشونجه يه سيغيلمايان دير. بيرداها سوريه اولايلارينى گؤز اؤنونه آلساق،گؤروروك كئچميشده بير ياندان “داعش” باشقا ياندان ” سوريه باغيمسيز اوْردوسو” سوريه نين بير بؤيوك بؤلوم توپراقلارينى أله كئچيرميش داها باشكند ” دمشق” شه هرينه ده مئيدان اوخويوردولار! آمما روسيه نين “بشار اسد” ى دَسته كله مك آماجى ايله بو گرگينليگه قاتيلماسى، بشار أسدين يئنى دَن ديرچلمه سينه نَدن اولدو. بير ياندان دا آمئريكانين سوريه ده اولان پ ك ك قوْللاينا ( پ ى د- ي پ گ) بلكه آرتيق گووه نمه سى، ” سوريه باغيمسيز اوْردوسونو” گوجسوز دوروما سالاركن ، توركيه نين ده آجيغينا نَدن اولدو.
بو گئرچكلرى دوشونه رك منجه بوگونكو “زئيتون دالى” آدى آلتيندا گئدن ساواش بير ياندان توركيه- روسيه ياخين ايش بيرليگى (يا داها دوغروسو روسيه نين چاليشقانسيزليغى- منفعل ليگى)ائتگى سى آلتيندا – يالنيز توركيه نين اولوسال منافعينى دوشونوركن- باش وئرسه ده پرده آرخاسيندا توركيه- آمئريكا ايش بيرليگى چَرچيوه سينده ” سوريه باغيمسيز اوردوسونو” گوجلنديرمك آماجى ايله ايره لى گئدير. بئله ليك له:
١- توركيه، روسيه-آمئريكا ياريشماسيندان يارارلاناراق اؤز اولوسال ايستكلرى اوغروندا سينيرلارينى گله جك كورد تئرور اورگوتلريندن آرينديرير. بيرده اولدوقجا سوريه توركمن لرينى دَسته كله يير.
٢- آمئريكا ، توركيه نى داربه اولايندان سوْنرا ديله توتاراق، “زئيتون دالى” ساواش پيلانى قونوسوندا گؤرمز كيمى داوراناراق، توركيه نى روسيه دَن اوزاقلاتماغا چاليشير.
٣- “سوريه باغيمسيز اوْردوسو” گوجلنديكجه سوريه قونوسوندا گئدن هر هانسى بير دانيشيقدا گوجلو قوْنومو ألده ائده بيلير. بئله ليك له آمئريكا- روسيه دئنگه سى سوريه قونوسوندا يئنى دَن اويغولانير.
بو يوخاريدا سايديغيم سوْنوجلارى دوغرولايان بير قانيت بودوركى دونن بشار اسده قارشى چوخلو يؤنه تگيل قوروپلار ” سوچى” دانيشيقلارينا قاتيلماديقلارينى بيلديريبلر.

پوزغون توفارقانلى
٠٧/١١/٩٦

این مطلب را شیر کنید

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *