خانه / تورکجه / گئدیپ آزاد یاشاماق ایسته ییرم

گئدیپ آزاد یاشاماق ایسته ییرم

آغلار-گولر آیین لاپ طراوتلی گونلری ایدی. چؤل-باییر یاغان یاغیشین ائتکی‌سیندن قهقهه چکمه‌یه باشلامیشدی. چمن‌لیکده گؤبلکلر یاغان یاغیشدان ایسلانماسینلار دئیه، چتیرلرینی آچمیشدیلار. قوشلار بوداقدان بوداغا اوچوشوب یازین گلمه‌سینین موشتولوغونو آغاجلارین قولاقلارینا پیچیلداییب، اونلاری آییلتماغا چالیشیردیلار. کؤچری قوشلار گونئی بؤلگه‌لرده هاوانین دؤزولمز درجه‌ده ایسینماسینا باخاراق، قاییدیب گؤلون قیراغینداکی اوتلوقدا یووالارینین سیل سوپورونه بئله باخمیشدیلار. دیشی اؤردکلر یومورتلاییب اوستونده یاتمیشدیلار.

رسول قدیری

کورت یاتان تویوغون یییه‌سی یای-یاز تعطیل گونلرینین بیر چوخونو، سحر تئزدن قالخیب یولداشلاری ایله بیرلیکده دوغا گزیسینه گئدردی. اونلارین داها چوخ گئتدیکلری یئر، همین گؤلون قیراغی ایدی. دینج بیر ساحیلدن تورلارینی سویا آتیب، بیر نئچه بالیق توتوب، ناهارا بیشیره‌ردیلر. آخشاملار ایسه گؤلون یاخینلیغیندا اولان اوتلوقلا مئشه‌لیکده گزه‌ردیلر. بعضی گئجه‌لر حتی ائله همین یئرده اودون توپلاییب، تونقال قالاییب، بیر گئجه‌نی ده اورادا کئچیره‌ردیلر. 
او جومعه آخشامی دا، کیشی دوستلاری ایله صاباح آلاتورانلیقدا، گؤل ساحیلینه ساری گئدیب، آخشامادک دولانماق قرارینی کسمیشدیلر. او، سحر ساعات دؤرد تامامدا اونون پایینا دوشن، گرکن لوازیمی گؤتوروب، قاپی قارشیسیندا دایانمیشدی. اوزاقدان گلن ماشینین چیراقلاری گؤز وورونجا، ماشینداکیلار یولداشلاری اولدوغونو آنلاییب، پیادا یولوندان خیابان قیراغینا کئچدی. ماشین اوندان بیر-ایکی آددیم ایره‌لی‌ده دایانیب، آرخا صاندیق آچیلدی. کیشی لوازیمینی صاندیقدا یئرلشدیرندن سونرا، آرخا قاپینی آچیب اوتوران یولداشلارینی سالاملایاراق اونلارین یانیندا اوتوردو. ماشین یولا دوشدو. قرارلار کئچن آخشام قویولدوغونا گؤره، یول‌اوزونو کیمسه دانیشمادی. آرخا اوتوراجاقدا اوتورانلارین بیری یوخویا دالمیش، باشقا ایکیسی ده مورگوله‌ییردی. بیر ساعات کئچمه‌دن گؤلون قیراغیندایدیلار. هاوا ایشیقلانماغا باشلامیشدی. ماشیندان یئره ائندیلر. سحر سازاغی جانلارینا اوشوتمه اوتورتدو. بؤرکلرینی قولاقلارینین اوستونو اؤرته‌جک قدر آشاغی چکیب، أللرینی بیر-بیرینه سورته‌رک، صاندیقداکی لوازیمی گؤتوروب اوتلاغا ساری یئریدیلر. یولداشلاردان بیری چادیر قورماغا، باشقاسی اودون ییغماغا، بیر آیریسی ایری داشلاری بیر-بیرینین یانینا دوزوب اوجاغین یئرینی حاضیرلاماغا مشغول اولدو؛ دؤردونجوسو یولداش، لوازیمین ایچیندن چایدانی، چاینیکی، سینینی هم ده ایستکانلارلا قندقابینی آییریب، آپاردیقلاری ایچمه‌لی سو ایله چایدانی دولدوراندان سونرا، اونو اوجاغین داشلاری اوستونه قویدو. بئشینجی یولداش، ماشینین سوروجوسو ایدی. او، آرالاریندا اولان یازیلمامیش قورالا گؤره، اؤزونه باشقالاریندان آز ایشله‌مک قونوسوندا حاق وئریردی. اونا گؤره ده اوتومبیلین قاپیلارینی قیفیللایاندان سونرا مئشه‌لییه ساری گئدیب، اورادا گزیشمه‌یه باشلادی. چادیر قورولدو. ایچینه حصیردن، پر-پتودان سالیندی. اوجاقدا اود یاندیریلاندان آز سونرا آلومینیوم چایدان اوستونده سیزیلدادی. بیردن-بیره مئشه‌لیکدن ایکی اؤرده‌یین یئریندن سیچراییب قاناد چالماسینین سسی، چادیر یانیندا اولان دؤرد کیشینین باخیشلارینی او طرفه چئویردی. سونرا دا اونلار، هاوادا اوچوب اوزاقلاشان همین ایکی اؤرده‌یی باخیشلاری ایله ایزله‌دیلر. بیر آزدان اؤردکلر اوچان طرفین اوتلارینین ایچیندن، بئشینجی کیشی هر بیر ألینده اوچ اؤردک یومورتاسی یولداشلارینا قوشولوب دئدی:
– بویورون بو دا سحر یئمه‌ییمیزین یومورتاسی!
یولداشلاردان بیری قاش-قاباغینی تؤکه‌رک سوروشدو:
– هارادان گتیردین او یومورتالاری؟ دئمه کی همین اوچان اؤردکلرین یومورتالاری‌دیر!
– هه اونلاردیر. بوندا نه وار کی؟!
– نه اولاجاق؟ اونلار یئمک اوچون یوخ، بلکه اؤردک جوجه‌سی اولماق اوچون‌دور. بللی دئییل یازیق آنالاری نئچه گون ایمیش اونلارین اوستونده یاتمیشیمیش، هم ده نه آرزو ایله، نه هوس ایله… تئز اونلاری قایتار یئرینه قوی…
یومورتالاری گتیرن کیشی گولومسونه‌رک دئدی:
– یاخشی-یاخشی، آنالیق دویغولارین جوشماسین. یئر کوره‌سیندن آلتی جوجه أکسیک اولسا نه اولار کی؟!
– میرتا چئویرمه، سنه دئییرم قایتار اونلاری یئرینه قوی. گونوموزو سحر-سحر خاراب ائله‌مه…
دوستلارین بیر باشقاسی اعتیراض ائدن یولداشینا باخیب دئدی: 
– غضبلندییین اوچون سنه حاق وئریرم دوستوم آنجاق نه یازیق کی ایش، ایشدن کئچیب‌دیر. بوندان بئله داها قایتارسا دا بیر فایداسی یوخ‌دور. اوچان او اؤردکلر بیر داها قاییتمازلار…
– بس بیز نه ائتمه‌لیییک؟
– تأسسوفله هئچ بیر ایش گؤرمک اولماز… 
دوستلاردان بیر آیریسی دئدی:
– ائله‌دیسه نئیله‌مک، من گئدیرم تاوایا بیر آز یاغ تؤکوب اوجاغین اوستونه قویام. باشقا چاره‌میز یوخ‌دورسا بیشیریب یئیه‌ریک.
اعتیراض ائدن یولداش دئدی: 
– سیز اؤزونوز بیلرسینیز، آنجاق من دیلیمی او یئمه‌یه وورمارام. 
آرتیق چای دمله‌نیب، سوفره چادیرین ایچینه دؤشنمیشدی. تاوایا بیر آز یاغ تؤکوب اوجاغین اوستونه قویدولار؛ یومورتالارین ایکیسینی بیر-بیرینه چالیب تاوایا تؤکدولر. اونلارین ساریسیندان شاخه‌لنمیش قان دامارلاری هر بئش یولداشین مورالینی پوزدو. دئمک نوطفه‌لر یومورتالارین ایچینده دامار آتماغا باشلامیشدیلار. سیندیریلان داها ایکی یومورتا دا ائله او سایاق ایدی. تکجه ایکی سینمامیش یومورتا قالدیقدا، ائوینده کورت تویوغو اولان کیشی، یومورتالاری سیندیریب تاوایا سالان یولداشینا سسله‌نیب دئدی:
– أل ساخلا یولداش! چوخ یوکسک احتیماللا ائله بونلار دا باشقالارینا تایدیلار. اولورسا اونلاری منه وئر. ائویمده تویوقلاریمین بیری کورت دوشوب‌دور. قاییدینجا اونو باسدیراجاغام. بو ایکی یومورتانی دا باشقا یومورتالارین یانینا قویارام. بلکه بونلارین جوجه‌لرینی قورتارا بیلدیم. اونسوز دا بیز، بونلاری یئیه بیلمییه‌جه‌ییک…
یولداشلار بیر-بیرینه باخدیلار. هامی دوستلارینین فیکری ایله راضیلاشیب، یومورتالاری اونا وئردیلر. گونش داها اوفوقدن قالخیب اؤزونو گؤسترمیشدی. کیشی یومورتالاری بیر-بیر اووجونون ایچینده ساخلایاراق، باش بارماغی ایله ایشاره بارماغینی حلقه‌له‌ییب اونلاری گونشه ساری توتاراق، ایچینده نوطفه اولوب اولمادیغینی یوخلادی. سونرا –اینشاالله کی هر ایکیسینین نوطفه‌سی واردیر- دئییب اونلاری نئچه قات دسماللارا بوکوب، گونشین شوعاعلاری بیر باشا یومورتالارا دَیمه‌سین دئیه، اونلاری چادیرین ایچینه آپاریب، دینج بیر بوجاغا قویدو. دئمک بو اولای، او بئش کیشینین تعطیل گونونون دادینی قاچیرتمیشدی؛ اونا گؤره ده، هئچ بیرینده گون‌باتانادک اورادا قالماق اوچون حال قالمامیشدی؛ اوسته‌لیک او ایکی ساغلام یومورتانی پارچایا بوروین یولداش، تئزلیکله قاییدیب کورت تویوغو باسیرماغی دوشونوردو. کیمسه دینیب دانیشمیردی. بوتون بونلارا باخاراق، اونلار قاییتماغا یوبانمادیلار. کؤنولسوزلوکله، سس‌سیز-سمیرسیز سحر یئمکلرینی یئیه‌ندن سونرا، داغیلیشیب، هره‌سی بیر بوجاقدا بیر آز گزیشدی. ناهار اؤینه‌سی گؤلدن بیر نئچه بالیق توتوب، تاوادا قیزاردیب یئیه‌ندن سونرا، دایانمادان ائولرینه دوغرو گئری دؤندولر. کنده چاتدیقلاری زامان، گونشین باتماغینا خئیلک واخت قالیردی. تویوغو کورت یاتان یولداش، قاپی-قونشونون ائوینه باش چکیب هر کسدن بیر نئچه مایالی، تزه یومورتا آلیب بیر یئره توپلادی. تویوقلار نینینین دینج بیر بوجاغیندا، کورت تویوغو اوچون اؤزل بیر یئر حاضیرلادی. سونرا او ایکی اؤردک یومورتاسینی دا توپلادیغی اون ایکی تویوق یومورتاسینا قاتاراق، هامیسینی نینه دوزوب، آنالیق دویغوسو جوشان تویوغونو اونلارین اوستونه قویدو. تویوغون قرارسیزلیغی کئچیب، آغیر-آرخایین یومورتالارین اوستونده اوتوردو. قیقیلدایاراق دیمدییینین اوجو ایله بیر داها اؤزو، یومورتالارین دوزه‌نینه یئتیشیب، اونلارین هامیسینی للکلری تؤکولموش ایستی قارنینین آلتیندا گیزلدیب، خومارلانان گؤزلرینی یومدو. تویوق، اون دوققوز گون سونرا بیرینجی جوجه دیمدییینین اوجو ایله دوستاغینین دووارینی چیرتیب آزادلیغا سالام وئرینجه، آنجاق یئییب ایچمک، بیر ده قارنینی بوشالتماق اوچون یومورتالارین اوستوندن قالخیردی. بیر آز گزیشیب بیر-ایکی دؤنه آزاد هاوادا قاناد چالیردی؛ سونرا دا یومورتالارین یانینا قاییدیب، اؤنجه دیمدییی ایله اونلارین دوزومونو دَییشیب چئویریره‌رک، یئنه قارنینین آلتیندا گیزلدیردی. عجبا بوتون بونلاری گیج ساندیغیمیز حیوان، هارادان، کیمدن اؤیرنمیشدی؟!
نه ایسه، تویوق یومورتالارین اوستونده یاتان گوندن دوز اون دوققوز گون اؤتدوکده، اونلارین بیرینین قابیغی چیرتلاییب، ایچینده‌کی جوجه ایلک جوککولتوسو ایله آناسینی سالاملادی. تویوق، باشقا یومورتالاری اونوتمادان، اونا یومورتادان بوتؤو چیخماق اوچون یاردیم ائتدی. گلن ایکی گونون ایچینده، تویوق یومورتالارینین داها سککیزی جوجه‌لشدی. یومورتادان چیخان جوجه‌لر، دایانمادان، یئنیدن آنالارینین ایستی سینه‌سینین آلتینا سوروشوردولر. تویوق، بلکه ده او چاغین داها حساس‌لیغینی درک ائده‌رک، او اوچ گونون عرضینده أصلا نینی ترک ائتمه‌دی؛ یئمه‌یی اوچون جوجه‌سی چیخان یومورتالارین تیکه‌لرینی دیمدییینه آلیب چئینه‌ییردی. آز یئدییی اوچون، قارنیندا بوشالتمالی بیر شئی اولموردو. اولاندا بئله، یاتدیغی یئرده ایشینی گؤروب قوخوسونا تابلاشیردی. دئمک، آرتیق جوجه‌سی چیخمامیش آنجاق ایکی تویوق ایله ایکی اؤردک یومورتاسی قالمیشدی. تویوق بیر گون داها دؤزدو. ایییرمی ایکینجی گون، غریب بیر سس نینده سسلندی؛ اؤردک یومورتالارینین بیرینین ده قابیغی چیرتیب، اؤرده‌یین ائنلی دیمدییی، نینین دوارینداکی یاریقلاردان ایچری دوشن گونش زولاقلارینین قارشیسیندا پاریلدادی. تویوق، او اؤردک جوجه‌سینین ده یومورتادان چیخماغینا یاردیم ائدندن سونرا، یئریندن قالخیب جوجه‌لرینی آرخاسینا سالاراق حیطه چیخیب، بیر داها قالان یومورتالارین اوستونه قاییتمادی. بو حسابلا، قالان ایکی تویوق یومورتاسی لاق ایدیلر؛ بلکه نینده قالان اؤردک یومورتاسینین جوجه‌سینین چیخماسینا ایسه، بیر گون داها زامان گرکیردی؛ آمما تویوق بونو بیلمیردی…
***
او گوندن سونرا تویوق، هر سحر چاغی گونش اؤزونو گؤسترن کیمی نیندن چیخیب، بالالاری ایله حیطده گزیشیب، اونلاری دویوزدوروردو. قیققیلدایاراق بالالارینی چاغیریب، تاپدیغی یئیه‌جکلری اونلارا یئدیزدیریردی. آنجاق اؤردک‌بالاسینین آیریجالیغی، ائله ایلک گونلردن اؤزونو گؤسترمه‌یه باشلادی؛ او باشقا جوجه‌لردن داها یئییمجیل ایدی. دیمدییینه باتان هر شئیی یئییردی. دانیشیغی هم آنالیغیندان هم ده باشقا جوجه‌لردن فرقلی ایدی؛ آمما أن گؤزه‌گلن فرقی، حوووضداکی سو ایله ایلگیلی ایدی. تویوقلا باشقا جوجه‌لرین حیطده اولان حوووضون سویوندان قورخوب یاخینلاشمادیغینا باخمایاراق، اؤردک هله خیردا بیر جوجه اولدوغو حالدا دا، سویو چوخ سئویردی؛ هر گونون بیر نئچه ساعاتینی، سئوه-سئوه حوووضون سویوندا قویروغونو بولاییب، قاققیلدایاراق اوزوردو؛ او بو ایشدن چوخ ذؤوق آلیردی. هردن‌بیر ده، باشینی سویون ایچینه آپاریب آشاغییا دالماقلا، حوووضون تکیندن نه‌سه دیمدییینه آلیب قاییدیردی. دویونجا سودا اوینایاندان سونرا، پرده‌لی آیاقلارینی حوووضون قیراغینا آتیب، سودان ائشییه چیخینجا، قانادلارینی هاوادا بیر-بیرینه چالیب اؤزونو قورولاییردی. بیر آن ایچینده بوتون سو دامجیلاری اونون یاغلی للکلریندن سوزوب یئره تؤکولوردو. سانکی او هئچ سویا گیرمه‌میشدی. او حاللارا تویوقلا باشقا جوجه‌لر، شاشقین-شاشقین آنجاق تاماشا ائده بیلیب، یاخینلاشماغا جسارت ائتمیردیلر. گونلر، هفته‌لر بیر-بیرینین آردیندان بو سایاق گلیب اؤتدولر. جوجه‌لر توولا بؤیویوردولر. آستا-آستا کؤرپه‌لیک توکلرینی تؤکوب همیشه‌لیک للکلرینی چیخاردیردیلار. اؤرده‌یین حتی آل-ألوان للکلری ده باشقا جوجه‌لردن فرقلی ایدی. اونلار گونشین پارلاق شوعاعلارینی اؤزونه قایتاریردی. بعضن اونلارا باخانلارین گؤزونو بئله قاماشدیریردی. اؤردک آنالیغی ایله جوجه‌لردن باشقا، یانیندا آیری بیر اوچاغان گؤرمه‌دییینه گؤره، اونلارین سئوگیسینی اوره‌یینده بسله‌ییردی. گئت-گئده جوجه‌لر کؤرپه‌لیک یاشلارینی آرخادا بوراخیب یئتگین‌لیک دؤنملرینی باشلادیلار. داها بئچه‌لرله فریکلرین آیریجالیغی آیدینلاشیردی. هر بئچه اؤزونه بیر فریک سئچیردی. بو آرادا فریکلر آراسیندا آیاقلاری للکلی، پیپییینین اوستو اینجه للکلرله اؤرتولو گؤیچک بیر فریک ده وار ایدی؛ باخانلار بئله ظن ائدیردیلر کی، او فریک آیاقلارینا دیزاوستو چکمه گئیمیش، باشینا دری بؤرک قویوب‌دور. بوتون بئچه‌لر اونون پئشینده‌یدیلر؛ آنجاق او فرییین اوره‌یی اؤردک اوچون چیرپینیردی. اؤرده‌یین آیریجالیقلاری اونو والئح ائدیردی؛ اونون للکلرینین رنگینه وورولموشدو. سودا اوزمک یئته‌نه‌یینین حیرانی ایدی. بوتون بونلارا، گرک اؤرده‌یین بو گونلرده ألده ائتدییی اوچا بیلمک یئته‌نه‌یینی ده آرتیراق. سون گونلرده او، چوخ اوزاقلاشماسا دا بئله، آنالیغی ایله باشقالارین حیران گؤزلرینین قارشیسیندا نئچه کز اوچوب دووارین اوستونه قونموشدو. اونون بو ایشینی گؤرن بئچه‌لر ده بو ایشی گؤرمه‌یی دنه‌ییب، آنجاق تکجه آتیلا بیلمیشدیلر. اؤردک ده همین آیاقلاری چکمه‌لی، باشی پاپاقلی فریکدن خوشلانیردی. بیر گون اونون خطیرینه بئچه‌لرله ساواشمالی اولدو. جوثثه‌سی اونلاردان ایری اولدوغونا گؤره، بئچه‌لرین هئچ بیری اونو یئنه بیلمه‌دی. او گوندن سونرا، اؤردکله پاپاقلی فریک ایکی سئوگیلی کیمی بیرگه دولانیب، قاناد-قانادا باشقالاریندان اوزاق دینج بیر یئرده یاتیردیلار…
یازین آردینجا یایین ایستی گونلری ده گلیب اؤتدو؛ آستا-آستا بئچه‌لر خوروز، فریکلر تویوق اولماقدایدیلار. پاییزین ایلک سرین یئللری أسمه‌یه باشلایان گونلرین بیرینده، گؤی اوزونده گؤزنه‌لینمز بیر اولای باش وئردی. دئمک هاوانین سویوماسینی دویان وحشی اؤردکلر، دسته ایله گونئیه، هاوالار ایستی اولان طرفه دوغرو اوچوردولار. حیطده‌کی تویوق-خوروزلارین هامیسی ایستر-ایسته‌مز باش قالدیریب اونلاری سئیر ائتدیلر. اونلاری گؤرن اؤرده‌یین اوره‌یینی، بلیرسیز بیر دوغمالیق چیرپیندیردی. او حیطدن اوچوب دامین تیمینده اوتوردو. گؤی اوزونده اوچوشان سورو ایچیندن، او یازین یومورتاسیندان چیخان دیشی اؤردکلرین بیریسینین گؤزو اونا ساتاشیب سورودن آیریلاراق، گلیب دامین تیمینده، ائوجیل اولموش اؤرده‌یین یانینا قوندو. حییطده‌کیلر قاققیلداشماغا باشلادیلار. وحشی اؤردک، اوزونو ائوجیل‌لشمیش اؤرده‌یه توتوب دانیشماغا باشلادی:
– بس سن بورادا نئیله‌ییرسن؟! سنی هئچ سوروموزده گؤرمه‌میشدیم…
– نئجه‌ یعنی نئیله‌ییرم، بوراسی منیم ائویم‌دیر. حیطده گؤردوکلرین ده آناملا یولداشلاریم‌دیرلار. سورو نه‌دیر؟ سن کیمسن؟!
– نه؟! آخی بوراسی سنین ائوین اولا بیلمز کی! سنین ائوین وحشی دوغا اولمالی‌دیر. سن حیطده‌کی تویوق-خوروزدان دئییلسن کی؛ 
– یوخ سن یالان دانیشیرسان. من گؤزومو آچاندان آشاغیدا‌کی آناملا یولداشلاریمی گؤرموشم. 
– بلکه ده سن دوز دئییرسن آمما، من یالانچی-پالانچی دئییلم؛ بیر آن اؤزونه، منه، بیر ده اونلارا باخ. گؤر سنله اونلارین آراسیندا نه قدر اوخشارلیق گؤره بیلرسن؟ اؤرنه‌یین، ایندی سن اوچوب بو دامین تیمینده اوتوروبسان، عجبا اونلارین دا بیریسی اوچوب بورایا گله بیلرمی؟ هئچ اونلارین اوچماسینی گؤروبسنمی؟
ائوجیل‌لشمیش اؤردک درین بیر خیالا دالدی. یانیندا اوتوران اؤرده‌یه، حیطده‌کی تویوق-خوروزا، بیر ده اؤزونه باخدی. حطیدن بو دانیشیقلارین تاماشاچیسی اولانلار، سسلرینی یوکسلتدیلر. آناش تویوقلا پاپاقلی فریک، داها اوجا سسله قیققیلداشیردیلار. بو قالماقالی گؤرن وحشی اؤردک اوزونو ائوجیل‌لشمیش اؤرده‌یه توتوب دئدی:
– اوچ آرخامجا…
ائوجیل‌لشمیش اؤردک هئچ دانیشماغا ماجال تاپمادی. هله ده آزاجیق قوشقولو اولسا بئله، وحشی اؤرده‌یین آرخاسیجا اوچماغا باشلادی؛ آنجاق ایندییه‌دک اوزون بیر مسافه‌نی اوچمادیغینا گؤره، تئز-تئز یورولوب یئره ائنیردی. بو حالی گؤرن دیشی اؤردک ده دؤنه-دؤنه قاییدیب اونون یانیندا اوتورمالی اولوردو. اونلار آز اوچدولار، چوخ اوچدولار، ایکی ساعاتدان سونرا گؤلون قیراغیندا بیر کره‌لیک یئره ائندیلر. وحشی اؤردکلرین هامیسی اورانی ترک ائتمیشدیلر. آغاجلارین یاپراقلارینین رنگی سارالماغا باشلامیشدی. ائوجیل‌لشمیش اؤردک، یول اوزونو گؤیدن، قانادلارینین آلتیندا گؤردوکلرینه مات قالمیشدی. اونلاری بیرینجی دفعه ایدی گؤروردو. مقصده یئتیشدیکده، او یئکه‌لیکده حوووضو گؤرونجه، آز قالا گؤزلری حدقه‌دن چیخاجاقدی. گؤلون دؤوره‌سینده قو دئییردین قولاق توتولوردو. نفسلرینی دریب، ترک ائدیلن یووالارین بیرینه دوغرو گئتدیلر. قارشی قارشییا اوتوروب بیر توو دینمه‌دیلر؛ بیر آزدان وحشی اؤردک دانیشماغا باشلادی: 
– نه دوشونورسن؟ نییه او آنان، او یولداشلارینین بیریسی بئله آرخامیزجا گله بیلمه‌دی؟ 
– اؤزوم ده بونلارا مات قالمیشام؛ آنجاق بس نییه او ائودن باشقا بیر یئر، اونلاردان باشقا کیمسه یادیما گلمیر. منیم آنام او تویوق دئییلسه بس کیم‌دیر؟
– بوراسینی من ده یاخشی باشا دوشمورم آمما، هر نه‌دیرسه او ائوین یییه‌سیندن آسیلی اولمالی‌دیر. آداملار چوخ قورخونج، اؤزونو بیه‌نن، هر شئی اونلارا گؤره یاراندیغینی دوشونن یاراتیق‌دیرلار. هم ده چوخ تهلوکه‌لی‌دیرلر…
– آمما من بو حاقدا سنله أصلا راضی دئییلم. او ائوین آدامی هر گون بیزیم دن-دوشوموزو قارشیمیزا تؤکوب، سویوموزا نینیمیزه یئتیشر. چوخ دا مهریبان بیری‌دیر…
– بئله دوشونورسن؟ آمما آخی سن او ائودن هئچ ائشییه چیخماییبسان کی اونلارین باشقا اوزونو گؤره‌سن. بیر توو بوندان قاباق ایدی؛ اونلارین بیر نئچه‌سی بورایا گلمیشدیلر؛ یانلاریندا دا ایکی کؤپکلری ده گتیرمیشدیلر. أللرینده، ایکی لوله‌لی بیر دمیر آلت وار ایدی؛ او آلتی بیزه طرف توتاندا، لوله‌لرین اوجوندان اود پوسکوروردو. هر اود پوسکورمکله ده یولداشلاریمیزدان بیرینین باغری قانا بله‌شیب یئره دوشوردو. کؤپکلر درحال قانینا بله‌شن یولداشیمیزی دیشینه آلیب اونلارا آپاریردی. تانری او گونلری آپاریب گتیرمه‌سین؛ تکجه او گون، أن آزی ایییرمی یولداشیمیزی ایتیردیک؛ منیم گنج سئوگیلیم ده اونلارین بیری ایدی…
وحشی اؤردک بونلاری دانیشدیقجا گؤزلرینی اوزاقلارا تیکیب، درین بیر خیالا جومدو؛ گؤزلرینه دولان یاش گونشین اؤنونده پاریلدادی. بیر آزدان دانیشیغینین آردینی توتدو:
– آنامدان ائشیتدیییمه گؤره، آداملار بیر سیرا حیوانلاری ائولرینده بسله‌ییرلر؛ اونلارین یئیه‌جکلرینی، ایچه‌جکلرینی قاباقلارینا قویورلار؛ آمما بونلارین هامیسینی اؤزلری اوچون ائدیرلر. حیوانلار بؤیویوب أته دولونجا، اونلارا بیر خئیری اولمایانلاری کسیب أتینی یئییرلر…
وحشی اؤردک بونلاری دانیشینجا، ائوجیل‌لشمیش اؤرده‌یین، او آنادک آنلامینی باشا دوشمه‌دییی بیر اولای یادینا دوشدو. نئچه گون اؤنجه ائو یییه‌سینین ائوینه نئچه نفر یاد آدام گلمیشدی. قوناقلار ایچری کئچندن سونرا، ائو یییه‌سی حیطه چیخیب، تویوق-خوروزولاری قووالامیشدی؛ او، آنجاق بئچه‌لرین بیرینی توتاندان سونرا اونلاری کوچه‌یه بوراخمیشدی. ائوجیل‌لشمیش اؤردک، او خوروزو بیر داها گؤرمه‌دیکلرینین نه‌دنینی آنلاییب باشا دوشونونجه، کؤور‌لدی. وحشی اؤردک سؤزلرینین آردیندا، اؤزلرینین یاشام طرزیندن، آزادلیغین هزینه‌لی اولسا دا داها لذتلی اولماغیندان، اونون دا وحشی اؤردکلرین بیر اویه‌سی اولوب أصیل آتا-آناسی او سورونون ایچینده اولماغینا ایناندیغیندان، سورونون گئتدییی مقصدی آناسیندان سوروشوب اونو دا اؤزو ایله سورونون آرخاسیجا آپارماغا ماراغیندان دانیشدی. او دانیشدیقجا، آستا-آستا اونون سئوگیسی ائوجیل‌لشمیش اؤرده‌یین کؤنلونه دامدی. اونا یاخینلاشیب قورخا-قورخا قانادلارینی اونون بوینونا سالیب دئدی:
– گؤرونور سن حاقلیسان گؤزلیم؛ سؤزلرین منی ایناندیردی. من ده سنینله گلمه‌یه ماراقلییام، آنجاق اورتادا ایکی مسأله واردیر…
– نه‌دیر اونلار؟
– بیرینجیسی، من حیطده گؤردویون آنام اولماسا دا، آناش تویوغون، آنالیغیمین قارنینین ایستی‌سی ایله بو دونیایا گؤز آچمیشام؛ اونون محبتی ایله بسله‌نیب بویا-باشا چاتمیشام. اوسته‌لیک، او تویوقلارین ایچینده پاپاقلی گؤزل بیر فریک ده منیم سئوگیلیم ایدی. سنله بئله خبرسیز گلرسم، بلکه اونلارین اوره‌یی آجییار. بیر گئجه داها قاییدیب او نینده یاتیب اونلارلا ساغوللاشمالییام…
– و ایکینجی‌سی؟
– ایکینجی‌سی ده بودور کی، گؤردویون کیمی من ایندییه‌دک اوزاق مسافه‌لره اوچمامیشام. قورخورام سنی یوباندیریب حؤوصله‌دن سالام…
وحشی اؤردک بیر آز دوشونوب دئدی:
– بیر چتین‌لیک یوخ‌دور؛ سنی گؤزله‌یه‌جه‌یم؛ اوچوش حاقدا دا قورخولاجاق بیر شئی یوخ‌دور. اوچدوقجا قانادلارین آچیلاجاق، بوندان آرخایینام…
اونلار بونلاری دانیشینجا ناهار اؤینه‌سی گلیب چاتمیشدی. بیرلیکده چیخیب مئشه‌لیکده بیر آز گزیشیب، بیر شئیلر تاپیب یئدیلر. سونرا یووایا قاییدیب قاناد-قانادا قویوب بیر آز اویودولار. آخشام تویوقلارین نینه قاییداجاق واختیندان بیر آز تئز، قاییدیب دامین تیمینده اوتوردولار. وحشی اؤردک گئری چکیلیب اؤزونو باخیشلاردان گیزلتدی؛ ائوجیل‌لشمیش اؤردک ایسه حیطه ائنیب، تویوق-خوروزا قاریشدی؛ آنالیغی بیر توو اونو قووالاییب هده-قورخو وئردی. هاوا قارالمادان اؤنجه، هامیسی نینه کئچدیلر…
***
چیراقلار سؤنوب هر یئر سس‌سیزلشدی. دووارلارین دئشییینده‌کی جیرجیرالارین سسی قووزاندی؛ بلکه‌ ده هر یئره سس‌سسیزلیک چؤکدویو اوچون آرتیق ائشیدیلدی؛ ائوجیل‌لشمیش اؤردک سوزولوب کؤرپه‌لیک چاغلاری کیمی اؤزونو آنالیغینین قانادی آلتینا سالدی. آنالیغی قیققیلدایاراق اونا آجبقلانیب دئدی:
– نه ایش گؤرورسن؟ داها خیرداجا بیر جوجه‌ دئییلسن هااا… سحر-سحر او یاد قوشلا اوچوب هارایا گئتمیشدین؟
اؤردک بیر توو دینمه‌دی؛ سونرا دئدی:
– اوزاقلارا اوچوب گئتدیک. ایندییه‌دک گؤرمه‌دیییم یئره…
یئنه بیر جار هئچ بیری دانیشمادی؛ بیر آزدان اؤردک دانیشیغین آردینی توتدو:
– نئجه دئیه‌جه‌ییمی بیلمیرم آنجاق، سیزدن آیریلمالییام!
– بو نه سؤزدور دانیشیرسان؟! او یاد قوش سنین قولاقلارینا نه اوخویوب؟
– أصلینده اونونلا بیر ایلگیسی یوخ‌دور؛ او آنجاق منیم گؤزلریمی، گؤره بیلمه‌دیییم حقیقتلره آچدی. بیلیرسن آناجان، ایچیندن چیخدیغیم یومورتا سنین قارنینین آلتینا هارادان گلیب یئرلشدیریلدیییینی بیلمه‌سم ده، آرتیق او یومورتا سنین یومورتان، من ده سنین دوغما اوشاغین اولمادیغیما قوشقوم قالماییب‌دیر…
– یعنی منیم ایستی باغریمین حرارتی ایله بسله‌نیب دونیایا گؤز آچدیغینا اینانمیرسانمی؟ گؤز آچدیغین گوندن بو گونه کیمی، سنی گؤیده اوچان اووچو قوشلاردان، قارغالاردان، یئرده کمینینده اوتوران پیشیکلردن، زهرلی بؤجکلردن قورودوغومو دانیرسانمی؟…
– هئچ اینانماز اولا بیلرمییم؟ ألبته کی اینانیرام آنجاق…
– آنجاق نه؟!
– آمما باشقا مسأله‌لر ده وار؛ بیر آن اؤزونه، منه، بیر ده باشقالارینا باخ. آرامیزدا اوخشارلیقدان چوخ فرق واردیر. آیاقلاریمیزا، دیمدیکلریمیزین شکلینه، دانیشیق طرزیمیزه، للکلریمیزین رنگی ایله جینسینه، یئریش اسلوبوموزا فیکیر وئر. سودا اوزمک، منیم أن چوخ سئودیییم ایش‌دیر؛ اوچماق منده اؤزونه‌مخصوص بیر یئته‌نک‌دیر؛ حالبوکی، سیزلر نه اوزه‌، نه ده اوچا بیلیرسینیز. اوسته‌لیک گئدیب آزاد یاشاماق ایسته‌ییرم. بو حیطدن چیخیب باشقا یئرلری گؤرمه‌دیییم سوره‌جه، دونیانین نئجه ده بؤیوک اولدوغونو بیلمه‌دیییم واختا کیمی، بلکه ده بورادا یاشماق، سنین محبتلی قانادلارینین کؤلگه‌سینده کؤلگه‌لنمک، منیم اوچون أن اویغون حیات سئچیمی اولا بیلردی، آنجاق نه یازیق کی داها دایانا بیلمرم..
آناش تویوق بیر زامان حزین-حزین سه‌ییردی؛ ایکی دامجی یاش گؤزلریدن آخیب باغرینداکی للکلرینه دَییب سیچرایاندان سونرا یئره دوشدو؛ درین بیر نفس آلیب دئدی:
– دئدیکلریندن او قدر باش آچماسام دا نئیلک؛ قرار سنینکی‌دیر. سن داها اؤزون اوچون بؤیوک بیر قوشسان؛ آنجاق گئتدییین یئرلرده سنی کیم قورویاجاق؟ سئودییین پاپاقلی فریک نه اولاجاق؟ هئچ بونلاری دا دوشونوبسنمی؟
– اؤردک درین بیر آه چکیب دئدی:
– گئتدیییم یئرلرده تک اولمایاجاغام؛ اؤزومله بیر جینسده اولان قوشلارین بؤیوک سوروسونه قوشولاجاغام. ایشین چتینی اونلارا چاتینجادیر. اونون اوچون ده سحر چاغی گؤردویون اؤردک، یول بلدچیم اولاجاق. سئودیییم پاپاقلی فریکدن ده آیریلماغیم چتین‌دیر، آمما چاره‌سیزم. اونونلا دا دانیشاجاغام…
آنا-بالانین آراسیندا داها باشقا دانیشیلاجاق بیر سؤز قالمامیشدی. اؤردک آستاجا سوروشوب اؤزونو آناش تویوغون قانادینین آلتیندان چیخاردیب، نینین باشقا بوجاغیندا تک اوتوروب خیسین-خیسین سه‌یریین پاپاقلی فرییین یانینا گئتدی. فریک اونو گؤرن کیمی اوزونو یانا چئویردی. اؤردک دئدی:
– مندن آجیقلی اولدوغونو بیلیرم؛ بلکه بیر آز دا سنه حاق وئریرم…
– سنین خطرینه باشقا بئچه‌لرله ساواشدیم؛ اونلارین هامیسینا یوخ دئدیم، آنجاق سن نئیله‌دین؟ دامین تیمینه قونان ایلک قوشلا اوچوب گئتدین…
– سنی سئومیشدیم، یئنه ده سئویرم؛ من ده سنین خطرینه ساواشمیشام، آنجاق… آنجاق بیزیم آرامیزدا یارانان علاقه، سئوگی اولا بیلمز! آخی بیز بیر جینسدن دئییلیک. منیم کؤنلوم اوچوب دولانماق ایسته‌ییر؛ هئچ بیرینیزین گؤرمه‌دییی بؤیوک گؤللرده اوزمک ایسته‌ییر؛ آمما سن نه اوچا، نه ده اوزه بیلیرسن. بیزیم بیر-بیریمیزله یاشاماغیمیزین سونوجو، ایکیمیزین ده حیاتیمیزین محو ائدیلمه‌سی‌دیر؛ یوخسا بیریمیز حیاتینی او بیریسینه قوربان ائتمه‌لی‌دیر…
– سنه بونلاری اونونلا سحر اؤینه‌سی اوچوب گئتدییین قوش اؤیره‌دیب‌دیرمی؟
– هم هه هم ده یوخ! بونلار اوندان آسیلی اولمایان حقیقتلردیر. او آنجاق منیم گؤزلریمی آچدی. آپاریب منه گؤرمه‌دیییم، تانیمادیغیم یئرلری گؤستردی.
– نه بیلیرسن اونون مندن یاخشی اولدوغونو؟!
– هئچ بیلمیرم؛ بو ایددیعانی ائده بیلمرم. بلکه ده هئچ سنین قدر منی سئومه‌دی، من ده سنین قدر اونو سئوه بیلمه‌دیم؛ آنجاق نییه باشا دوشمورسن؟ دئدیم آخی، سنله من بیر جینسدن دئییلیک! کئشکه زامان هئچ بیزی بیر-بیریمیزین قارشیسینا چیخارتمایایدی؛ یا دا کئشکه اونو گؤرمه‌ییب، گؤزوم حقیقتی گؤرمه‌یه آچیلمایایدی…
– دئمک گئدیرسن…
– هه گئده‌جه‌یم آنجاق أصلا سنی اونوتمایاجاغام. سن گؤزلسن؛ بئچه‌لرین أن گوجلوسو، أن گؤزلی یئنه ده سنی سئوه‌جک‌دیر. سنی گؤرمه‌یه قاییداجاغام…
– یوخ، گئتسن بیر داها قاییتما لوطفن. داغیمین تزه‌لنمه‌سینه دؤزه بیلمرم. گئت یئنی سئوگیلینله خوش اول…
پاپاقلی فرییین سون سؤزلری اونون اوره‌یینین نه قدر آجیشدیغینی یاخشیجا سرگیله‌ییردی. اؤرده‌یین سؤزلرینین دوز اولدوغونو بیلدییی حالدا بیر تورلو اوندان آیریلا بیلمیردی. آنجاق داها نه ائده بیلردی. او توتومونو توتموشدو. او گئجه داها کیمسه دانیشمادی. باشقالاری میشیل-میشیل اویودوقلاری حالدا، بو اوچ قوشون گؤزلرینه یوخو گلمیردی. بیر توو سونرا اونلار دا یاتدیلار…
***
صاباحیسی گون، ائو یییه‌سی همیشه‌کی کیمی نینین قاپیسینی آچیب، حیطه بیر آز دن سپدی. تویوق-خوروزلار پیرلایا-پیرلایا نیندن ائشییه چیخیب بیر توو حیطده قاناد چالاندان سونرا دنلری دنله‌مه‌یه باشلادیلار. اؤردک هامیدان سونرا نیندن چیخدی. وحشی اؤردک دامین تیمینه گلدی. وحشی حیاتا هوسلنن ائوجیل‌لشمیش اؤردک اونو گؤرجک، حیطده بیر نئچه کره قاناد چالیب، اونلاری قیزیشدیراندان سونرا، داما اوچوب اونون یانیندا اوتوردو. ائو یییه‌سی اونلارین ایکیسینی دامین تیمینده گؤردوکده آغزی آچیق قالدی. تویوق-خوروز قیققیلداشیردیلار. ائویییه‌سی تئز اؤزونه گلیب ایکی لوله‌لی توفنگینی گؤتورمک اوچون ائوه قاییتدی. وحشی اؤردک بو ایشدن اییْ آنلاییب یولداشینا –داها دایانماق اولماز، اوچ- دئدی. اونلار قاناد-قانادا اوچوب یوکسلدیلر. او ائوده بؤیوموش اؤردک، اوجالاردان، ایکی دؤور حیطین دؤوره‌سینه فیرلاناراق آشاغییا باخدی. بو حالدا ائو یییه‌سی توفنگ ألینده قاییتمیشدی. نیشان آلیب، هر ایکی گوللـه‌‌سینی اونا طرف آتدی. آمما اؤردک چوخ اوجالاردا اوچدوغو اوچون گولـله‌لرین هئچ بیری اونا دَیمه‌دی. ائو یییه‌سی یئنیدن توفنگینه مرمی قویماق ایسته‌دی. وحشی اؤردک یولداشینا –داها بس‌دیر، گل گئدک- دئدی. آناش تویوق دیل‌آلتی، –گئت، تانری یاردیمجین اولسون- دئدی. اونلار یئنیدن بیر-بیرینه قوشولدولار. ماهنیلار اوخویاراق، قاناد-قانادا گؤنئیه دوغرو اوچوب گؤزلردن ایتدیلر…

رسول قدیری
24/07/96

این مطلب را شیر کنید

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *