خانه / تورکجه / پوپولیست بیر ایستیقلالچی نین گؤرونتوسو – یونس شاملی

پوپولیست بیر ایستیقلالچی نین گؤرونتوسو – یونس شاملی

دگرلی اوخوجولاریمیز، سایین یونس شاملی نین، سایین ائلدار قاراداغلی نین «سول فئدئرالچیلیق» آدلی یازیسینا جواب اولاراق آرازنیوزا گؤندریگی بو یازینی ژورنالیسم ائتیگی گرگی عئینا یایینلاییریق.

سایین ائلدار بی و سایین یونس بی آزربایجان ملی حرکتینده فرقلی، یالنیز بیزجه بیر بیرینه ضد اولمایان، ایکی گؤروشون اؤنملی فیکیر و قلم صاحبلریندندیرلر و آراز نیوز اولاراق هر ایکی دگرلی قلم صاحبیمیزه سایغیمیز سونسوزدور.   

اینانیریق کی فرقلی فیکیرلرین اورتایا قویولماسی و حتی مدنی چارپیشمالاری دوغرولارین اورتایا چیخماسی اوچون حیاتی دیر.

بو مقاله لر سربست دوشونجه دولاشیمی و مدنی فیکیر چارپیشماسی آدینا سایتیمیزدا یایینلانماقدادیر.

دیله‌ییریک کی بوتون قلم صاحیبلریمیز یازیلاریندا یوموشاق و دوستجا بیر اسلوبلا میلی حرکتیمیزین ادبیاتینین داها دا زنگین و چاغین شرطلرینه اویغون حالا گلمه‌سینه قاتقی سونوب میلی چیخارلایمیزین اؤن پلاندا توتولماسیا یاردیمجی اولسونلار.     

پوپولیست بیر ایستیقلالچی نین گؤرونتوسو

یونس شاملی

ائلدار بئی قاراداغلی «سول فئدئرالچیلیق» عنوانی ایله بیر یازیدا، بیلین می ین (نامعلوم) بیر شخصی، نظرده آلاراق بو یازیسیندا فئدئرالچی دوشونجه نی اه له شدیرمیه یه چالیشیب. ائلدار بئی بو یازیسیندا گرچک لردن (رئال لاردان) اوزاقلاندیریب، اوخوجولارین قارانلیق لارا گؤتورور. بو یازی دا ائلدار بئی فئدئرالچی لاری دوشمن کؤله لری کیمی قلمه وئرمک له، اوخوجولارینین گؤزلرینه توپراق سه پیر. من ائلدار بئی ین بو یازیدا ائلدار بئی نئجه اوخوجولارین قاندیرماغا چالیشماسین قیسساجا گؤسترمک ایستیره م.  

 ائلدار بئی اؤزو بو قلمه چکدییی تانیتیمینی قریب (عجایب) آدلاندیریر و یازیر کی؛ «بیر آز قریب و کلاسیک اولمایان آنلاتیم اولدو! اؤزوم ده قبول ائدیرم!» سیتاتین سونو

 ائلدار بئی قاراداغلی اهانت دولو یازیسیندا فئدئرالچی لاری تورک میللی حرکاتی سیرالاریندا «سورونه ـ سورونه اه زیلن کسیمه» آدلاندیریر! و حتتا اؤزو بو آدلاندیرمانی قریب (دوزگون ایملاسی غریب دیر قریب یوخ. تورکجه ده عجایب سؤزو ایشله نیر) سانیز! و یازیر کی؛ «بیر آز قریب و کلاسیک اولمایان آنلاتیم اولدو! اؤزوم ده قبول ائدیرم!»! باشقا دئیشله فئدئرالچی لاری آشاغالاماغا چالیشیر! بو شیوه ده یازماق بیر اینسانا یاراشمایان، غیرمدنی و حتتا غیر اینسانی بیر یاخلاشیمدیر! آمما نه یازیق کی بو ائلدار بئی ین ایستفاده ائله دییی دیلدیر. آشاغالاما دیل، ائلدار بئی ین بو یازدیغی متینین تامام سطیرلرینده گؤزه چارپیر. آشاغالاما، اساسیندا گئریه قالمیش توپلوملارین اینفئکسیالانمیش کولتوروندن قایناقلانیر. بو دیل گونئی آزربایجان و ایران دا یاشایان تورک لرین دیل و یازی شیوه سی دئیر و اولابیلمز. بیزیم میللته، مدنی بیر توپلوما یاراشمیان بیر دیلدیر.

یالان یالنیز آلداتماق اوچون دور

ائلدار قاراداغلی یازیسیندا فئدئرالچی لارین ایستفاده ائتدیگی تئرمین لر و اسلوقان لاری ایضاح ائتمه یه گلینجه، بیر سیرا قوندارما و یالان تئرمین لری فئدئرالچی لارین آدینا یازماغا چالیشیر و اونلاری سیرالاییر. 

ائلدار بئی یازیسینی بئله دوام ائدیر؛ «میللتین قازاندیغی تئرمین: نه آز، نه چوخ “آذربایجان میللی حرکاتی”! / سول فئدئرالچی کسیمین مئیلی جه:”ایران و آذربایجاندا تورک خالقینین میللی-دئموکراتیک حرکاتی”!» ـ سیتادین سونو

میللت ین قازاندیغی آدلاندیریلان «آذربایجان میللی حرکاتی» هئچ ده میللت ین قازاندیغی بیر تئرمین دئیر. بو یالنیز ائلدار بئی ین و اونون تورک میللی حرکاتیندا فعالیت ائدن ایستیقلاچی لارین ایشله تدییی تئرمین دیر. ائلدار بئی دن سورماق لازیم دیر کی، عجبا بو تئرمینی هارادا میللت قازانمیشدیر؟ بو تئرمینه بیر مجلیس ده قرار وئریلمیشدیر می؟ یوخسا ائلدار بئی ین ذهنییتی ایله اویقونموش دئیه  «میللت قازانجی» آدلاندیریلمیشدیر؟

   تورک فئدئرالچی لار ایشله تدیی تئرمین لری، پوپولیزمه دایاناراق، میللت ین آدینا یازمازلار. بلکه بو تئرمین لری تانینمیش حقوق و سیاسی ادبیاتا دایاناراق، اویقون گؤرورسه لر سئچیب ایستیفاده ائدیرلر. آدین چکدیمیز تریمینه

  فئدئٰرالیست لر «آذربایجان میللی حرکاتی» یوخ، بلکه «تورک میللی حرکاتی» آدلاندیریرلار. چون کو «میللی حرکات» جغرافیانین (آزربایجان) حرکاتی دئیر، بلکه میللتیمیزین/ خالقیمیزین حرکاتی دیر و میللتیمیزی میللی کیملیی نین آدی آزربایجان دئیر، بلکه «تورک» دور. «آزربایجان» تورک میللتی نین میللی آدی دئیر، بلکه میللی وطنینین آدی دیر.

بیرده «آذربایجان» سؤزو تورکجه ده عرب الیفباسی ایله یازماق ایسترسک، اونو  فارسجا «ذ» حرفی ایله یوخ، بلکه تورک دیلی اورتوقرافی سمیناری قرارلارینا گؤره  تورکجه ده «ز» حرف ایله (آزربایجان) یازیلمالیدیر. آمما ائلدار بئی یازیسیندا تورکجه ده «آزربایجان» سؤزونو حالن فارسی الیفباسی ایله «آذربایجان» یازماقدادیر.

 ائلدار بئی قاراداغلی نین فئدئرالچیلارا قارشی تخریبات کاراکترلی یازیسینی بئله دوام ائدیر؛

میللتین قازاندیغی تئرمین: تورک میلتی! / سول فئدئرالچی کسیمین مئیلی جه: ایرانین تورک خالق!» ـ سیتاتین سونو»

 ائلدار بئی گؤردویونوز کیمی گینه ده «تورک میلتی» تئرمینین میللتین قازانجی آدلاندیر و سول فئدئرالچی لارین آغزیندان یالانجا «ایرانین تورک خالقی» تئرمینین ایشله دیر! ائلدار بئی بو یالانلارلا اوخوجولارین آلداتماغا و جایدیرماغا چالیشیر و بیر حقیقی پوپولیست کیمی اؤزون نومایش ائتدیریر. یوخسا من بیر سول فئدئرالیست اولاراق هئچ زامان هئچ یئرده «ایرانین تورک خالقی» تئرمینین نه ایشله تمه میشم و  نه ایشله تمه ره م.

ائلدار بئی ین پوپولیستیک یازیسی سون بولمور و سول فئدئرالیست لره قارشی رئکلامی یازیسینین سونونا دک دوام ائدیر.

من بو یازی ایله، شبهه لره یارانماسین دئیه، آلدادیجی دیل و کولتور ادبیاتیمیزدان اوزاقلاشسین دئیه، پوپولیزمه مئیدان وئریلمه سین دئیه سول فئدئرالچی تئرمینولوژوسون و گونده لیک ایشله تدییم تئرمین لری اوخوجولارا سوماق لا ائلدار بئین

 آلدادیجی یازیسینی ایمکان داخیلینده ایفشاء ائتمه یه چالیشیرام. و ائلدار بئی یه بو توصیه ده بولونوم کی اوخوجولاری ایله صمیمی اولماق ایستیرسه، یازماغا تشبوث گؤسترنده قلمه حؤرمت و اوخوجولارینادا سایقینی اونوتماسین.

سول فئدئرالچی لارین سیاسی ساحه ده ایشله تدییی تئرمین لری بئله دیرلر؛

میللتیمیزین میللی کیملی ینین آدی؛ تورک دور. آزربایجان تورکو و یا آذری و یا آذری تورکو دئیر. یالنیز تورک دور.

 میللی دیلیمیزین آدی؛ «تورکجه» و یا «تورکو» دور. آزربایجان تورکجه سی، آذری و یا آذری تورکجه سی دئیر یالنیز تورکجه یا تورکو دور. ایندی بعضن آزربایجان دا دانیشیلان شیوه نین آیرینتی سین گؤسترمک ایستین لر اونو «آزربایجان تورکجه سی» ده آدلاندیرلار. آمما دئدییم کیمی بیزیم میللی دیلیمیزین گرچک آدی «تورکجه» دیر.

 میللی وطنیمیزین آدی؛ آزربایجان دیر

میللی آزادلیق حرکاتیمیزین آدی؛ مضمون باخیمیندان «تورک میللی حرکاتی» دیر. حرکاتیمیز بوگون بین الخالق آلاندا دوزگون گؤرونسون دئیه، دونیا اوزره ایشله دیلن سیاسی دیل و دئمورکراتیک ادبیاتی مولاحیظه یه آلیرساق «تورک ـ آزربایجان میللی – دئموکراتیک حرکاتی» بیزیم میللتین سیاسی حرکاتینی آدلاندیرماق داها دوزگون اولور. بورادا میللی ـ دئموکراتیک آدلاندیرماق حرکاتین ایچ مضمونون عکس ائتدیرمک و آشیری میللت چیلیک دن (ائلدار بئی ین میللت چیلیک آنلایشیندان) آرا آچماق دئمک دیر. دئموکراتیک سؤزجویو یالنیز سؤز یوخ بلکه حرکاتین دئموکراتیک مضمونون گؤسترمک دئمکدیر. بوگون دونیانین هر بیر بوجاغیندا «میللتچیلیک» بیر آشیری و آنتی دئموکراتیک آنلایشی ایفاده ائدن بیر قاورام گؤرونور. بونا گؤره، حرکاتیمیز ایچه ریده و بین الخالق آلاندا چکیجی، موعاصیر اولماسین گؤسترمک اوچون حرکاتیمیزی مضمون جهتیندن «میللی ـ دئموکراتیک» آدلاندیرمالییق. 

ایران دا یاشایان اینسانلار، اونلارین ائتنیک/میللی کیملیینه باخمییاراق او اؤلکه ده (ایران دا) یالنیز وطنداش سایلیرلار. ایران بیر نئچه میللت لی (کثیرالملله) اؤلکه دیر. تاسفله ایران دئولتی میللی/ اتنیک تیپولوژیسو بیر میللت لی (فارس) دؤولت ـ میللت دیر و بونا گؤره ده غیرفارس میللت لر داخیلی بیر سؤمورگه چی سیاسته معروض قالمیشدیرلار. تورک میللی حرکاتی بو میللتی اسارت دن قورتارماق و عمومیت له بیتیشمیش تورک بؤلگه سینده (گونئی آزربایجان و اونا باغلی باشقا تورک توپراقلاری) میللی موقدراتینی تعیین ائتمک حاقینا مالیک اولماق اوچون  و وطن ده میللی و دئموکراتیک دئولتین برپا ائتمه سینه یؤنلنمیش بیر حرکاتدی. 

فئدرالچیلارا گؤره، گونئی آزربایجان دا و عمومیت ده ایران دا یاشایان تورک لر اوچون بوگونکو شرایط ده «ایستقلالیت ایسلوقانی» (ائلدار قاراداغلی نین اسلوقانی)، بیزیم میللتیمیزین حاضیرلیغی اولمادیغینا گؤره بیر آشیری و غیر رئآل اسلوقان (شعار) حئساب اولونور. فئدئرالچی لار ایرانین بوگونکو شرایطینده  ایران دا فئدئرال جمهوریتی برپا اولماسین بیر سیاسی آماج کیمی حئساب ائدیر و چالیشمالارین اؤ جهتده یؤنله ندیریر.

ائلدار بئی قاراداغلی، بیلمیرم نه دن، تورک میللی حرکاتی نین سیرالاریندا اولان فئدئرال چی لارا قارشی آلدادیجی و قارالاما کامپانیاسی آپاریر. ائلدار بئی آدین چکدییم یازیدا پوپولیست لرین تمثیلجی سی کیمی اؤزون اوخوجولارینا تانیتدیریر.  او بو یازی سی ایله «تورک میللی حرکاتی» سیرالاریندا گرگین لیک یارالتماغا چالیشیر و بیلمه دن فئدرالچی لاری حقارته معروض قویماق لا ایران دئولتینین ایستک لرینه خیدمت ائدیر.

سول فئدئرالچی لار نه دوشونورلر دئیه و یا  ایستیقلال اسلوقانینا بوگون نئجه باخیرلار دئیه، بیر نئچه یازنین لینکینی آشاغیدا اوخوجولاریمین خیدمتینه سونورارم؛

بسوی کدامین فدرالیسم؟ ـ یونس شاملی

http://shameli.blogg.se/2010/january/entry-65815324.html

 چرا طرفدار فدرالیسم هستید و نه استقلال؟ ـ یونس شاملی

http://shameli.blogg.se/2017/august/entry-2.html

فدرالیسم شعار ضروری مرحله کنونی ـ یونس شاملی

http://shameli.blogg.se/2017/september/entry.html

یونس شاملی

۲۰۱۷/۹/۲۷

یازیمین قایناغی؛

سول فئدرالچیلیق ـ ائلدار قاراداغلی

این مطلب را شیر کنید

Check Also

قاشقایی و اونون فولکلورو

کتاب قاشقایی و اونون فولکلورو به معنی قاشقایی و فولکلورش نام کتابی ایست که توسط …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

من ربات نیستم *

کتابخانه دیجیتالی بایداق راه اندازی شد. برای دسترسی به کتابخانه از منوی کتابخانه بایداق استفاده نمائید. رد کردن