خانه / ایران / سویلمده یئنی‌لیک یارتماق،گرگیرسه یئنی سویله‌مه کئچمک منجه گله‌جه‌ییمیز اوچون قاچیریلمازدیر.

سویلمده یئنی‌لیک یارتماق،گرگیرسه یئنی سویله‌مه کئچمک منجه گله‌جه‌ییمیز اوچون قاچیریلمازدیر.

۱۲فئورال۲۰۱۸ده ( ۲۳بهمن ۱۳۹۶جی ایلینده) آذربایجان بیلیم یوردونون تور‌ک اویرنجی‌لرینین “تورکجه” شوعار هایقیرماقلاری جاری دوزه‌نی چالیشا چکمه‌یه یئترلی اولموشدو.
اویرنجی‌‌لر بیلیم یوردونون سوروملولارینین بایات وعده‌لرینه اویمادان دوروما اویغون پراتیک آددیم آتماغا قرارا گله‌رک تورکجه‌نین اویره‌دیریلمه‌سین وورغولامیشدیلار.
نئچه ایل اویرنجی‌لرین صمیمی ایستک‌لری هابئله نامه یازماق‌لارینی جیددی توتمایان سوروملولارین قارشیسیندا تحصون ائتمک گئرچکدن ده ان دوغرو سئچیم‌ایمیش.
ایران ایسلام جومهوریتی‌نین بیر چوخ بولگه‌لرینده “دی اعتراضات”لاری ایله آدلانان یوروش‌لرین داوام ائتدییی دورومدا و بیر چوخلاری اوز‌ل‌لیک‌له مرکزچی آخیم‌لار آذربایجانین سوسقونلوغونو سیندیرماغا هر بیر فیریلداغا ال قویوب تورک‌ میللتین؛ تبریز باشدا اولماقلا، خیاوانلارا چکمه‌یینی پلانلاشتیردیغیندا، یئنه ده بو آذربایجان تورک‌ اویرنجیسی‌ایدی کی هئچ بیر آخیما، پارتیایا باغلی اولمایاراق، اوز رسالتینه دایاناراق، آذربایجان توپلوموندا حاکیم اولان سوسقونلوغو سیندیرماغا آددیم آتمیشدی. آمما او آددیم کی ایران ایسلام جومهوریتی‌نین بولانیق دوروموندا هئچ بیر آخیم اوندان آراج‌سال دا اولاراق یارارلانا بیلمه‌میشدی‌. آذربایجان بیلیم یوردونون تورک اویرنجی‌لرینین سیویل حرکتی یئترینجه سوسیال سانان اورتام‌لاردا ، تله رادیولاردا رئکلام اولوندو کیمی‌لری خبری منیمسه‌مک ایستسه‌‌لر ده آنجاق گئرچک‌لیک گوز اونونده‌ایدی، او دا بو کی؛ تورک اویرنجی‌لری آنا دیل‌لرینده؛ آذربایجان تورکجه‌سینده، اویره‌تیم آلماق ایسته‌ییردی‌لر.
هر نه چوخ ساده‌ایدی حاکیم دوزه‌نی چالیشه چکمه‌یه، آنا دیلینده خالقین ایستک‌لرینی سسله‌مک یئترلی‌ایمیش.
آذربایجاندا چئشیدلی قروپلارین اورتاق بیر فیکیره گله‌ بیلمه‌دییی دورومدا یئنه ده بو اویرنجی‌ایدی کی وطن قایغیسی چکن‌لری شاشیردیب،دوشمن‌لری ایسه قضب‌لندیردی.
اویرنجی حرکت‌لرینین وارلیغین گوز اونونه آلاراق بیل‌ملی‌ییک بیر سیرا اولکه‌لرده بورا دک بعضی (فرانسا، آمئریکا، گونئی کوره وب) اولکه‌لرده اویرنجی‌لرین اولکوجولوک‌لری یئنی آددیم‌لارین آتیلماسینا، سویلم‌لر ایچینده یئنی موباحیثه‌لرین یارادیریلماسینا هابئله یئنی سویلمین باشلانیشینا سبب اولموشدو.
مادام کی میللی حرکتده یئنی سویلمه کئچمه‌یه،
یئنی موباحیثه‌لرین قونوشولماغینا، فرقلی ندن‌لردن آسیلی اولاراق، یئترلی ماراق یوخدور،بو اونملی ایشین باشلانغینجی آذربایجان اویرنجی حرکتی‌نین چیین‌لرینه دوشمه‌سی قاچیریلمازدیر.
آذربایجاندا بیر سیرا بیلیم یورد‌لارینین ییغینجاق‌لاری‌نین سوز قونولارین هابئله بعضی یایین‌لانمیش درگی‌لرینین ایچ یازیلارینا باخدیقدا آذربایجان اویرنجی حرکتینده یئنی سویلمین یارانماسینین باشلانغینج‌ین سئزمک مومکوندور، البته یئنی سویلمین یارانماسیندا اویرنجی‌لرین موختلیف سئچکین اینسانلارلا، میللتین فرقلی قاتمان‌لاریلا هابئله فرقلی آخیم‌لارلا ایلگیده اولماق‌لاری ایستر_ایستمز قاچیریلمازدیر.
آنا دیلیمیزین اوستون قونومو، اونملی یئری‌ آذربایجان‌ اویرنجی حرکتینده شوبهه‌سیزدیر و ایل‌لر بویودور ثوبوت ائدیلمیش کی وازکئچیلمزدیر. آنجاق منجه باشقا ده‌یرلره لاقئید اولوب یالنیز چوخلوجا آنا دیلیندن یاپیشماق دا اویرنجی‌لرین الشدیریجی و اولکوجو دوشونمه‌ بیچیم‌لرینه اویغون دئییل.
اویرنجی توپلولوغونون اونملی تاریخی بیر آشامادا اولدوغونو دوشونورم. اویرنجی، میللتی اوزونه دایاق سانماق ایسته‌ییرسه،میللتین سسی اولاراق میللتین چئشیدلی قاتمان‌لاری ایله ایلگیده اولوب چئشیدلی قاتمان‌لارین سسی اولمالی‌دیر، یوخسا اوزونو توپلومدان باشقا سانیب، توپلومدا باش وئرن اولای‌لارا لاقئید اولورسا، نه یازیق کی منجه سون ایل‌لرده باش وئرمیش یانلیشلیق‌لارین تکرارلانماسینا شاهید اولاجاغیق.

این مطلب را شیر کنید

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

من ربات نیستم *

کتابخانه دیجیتالی بایداق راه اندازی شد. برای دسترسی به کتابخانه از منوی کتابخانه بایداق استفاده نمائید. رد کردن